వైభ‌వ్ సూర్య‌వంశీ అరంగేట్రంపై ఉత్కంఠ .. ఇన్‌స్టాగ్రామ్‌లో ఆస‌క్తిక‌ర పోస్టు..

వైభ‌వ్ సూర్య‌వంశీ అరంగేట్రంపై ఉత్కంఠ .. ఇన్‌స్టాగ్రామ్‌లో ఆస‌క్తిక‌ర పోస్టు..  

ఇంగ్లండ్‌తో నేడు జరగనున్న రెండో టీ20 మ్యాచ్‌కు ముందు భారత జట్టు ఎంపికపై ఆసక్తికర చర్చ సాగుతోంది. ముఖ్యంగా 15 ఏళ్ల యువ సంచలనం వైభవ్ సూర్యవంశీ అరంగేట్రం చేస్తాడా? లేదా అన్న ప్రశ్న అభిమానుల్లో ఉత్కంఠ రేపుతోంది. ఇటీవల తన ఇన్‌స్టాగ్రామ్ స్టోరీలో ‘కొత్త అధ్యాయం’ అనే క్యాప్షన్‌తో చేసిన పోస్ట్ ఈ ఊహాగానాలకు మరింత ఊతమిచ్చింది. యూకే పర్యటనలో భాగంగా ఐర్లాండ్‌తో జరిగిన రెండు టీ20 మ్యాచ్‌లు, అలాగే వర్షం కారణంగా రద్దైన తొలి ఇంగ్లండ్ టీ20లో వైభవ్‌కు తుది జట్టులో అవకాశం రాలేదు. అయితే ఈసారి అతడికి అవకాశం దక్కే అవకాశాలపై చర్చ జోరుగా సాగుతోంది. ఇదిలా ఉండగా, యువ ఆటగాడిని జట్టులోకి తీసుకురావడంలో ఎలాంటి తొందర అవసరం లేదని భారత బౌలింగ్ కోచ్ మోర్నీ మోర్కెల్ అభిప్రాయపడ్డాడు. ఇప్పటికే జట్టులో ఉన్న ఆటగాళ్లకు పూర్తి మద్దతు ఇవ్వడం కోచింగ్ సిబ్బంది బాధ్యత అని ఆయన స్పష్టం చేశాడు. టీ20ల్లో అగ్రశ్రేణి బ్యాటర్‌గా నిలిచిన అభిషేక్ శర్మ, ప్రపంచకప్‌లో కీలక పాత్ర పోషించిన సంజూ శాంసన్ వంటి ఆటగాళ్లపై విశ్వాసం కొనసాగాలని పేర్కొన్నాడు. యువ ఆటగాళ్లు అవకాశాల కోసం తలుపు తడుతున్నా, ప్రస్తుతం జట్టులో ఉన్నవారికి అండగా నిలవడం అత్యంత ముఖ్యమని వివరించాడు.

అయితే వైభవ్ ప్రతిభను మోర్కెల్ ప్రశంసించాడు. నెట్ సెషన్లలో అతడు చూపిన బ్యాటింగ్ తమను ఆకట్టుకుందని, అంతర్జాతీయ స్థాయిలో కూడా ఒత్తిడిని చక్కగా ఎదుర్కొనే సామర్థ్యం అతడిలో కనిపించిందని అన్నాడు. జట్టులోని వాతావరణానికి కూడా వైభవ్ త్వరగా అలవాటు పడినట్లు వెల్లడించాడు. అవకాశం వచ్చినప్పుడు తన ప్రతిభను నిరూపించుకునే స్థాయిలో అతడు సిద్ధంగా ఉన్నాడనే నమ్మకాన్ని వ్యక్తం చేశాడు. యూకే పర్యటనలో అతడు గత మూడు ఇన్నింగ్స్‌లలో 5, 0, 1 పరుగులే చేయడంతో జట్టు యాజమాన్యం మార్పులపై ఆలోచించే అవకాశముందనే అభిప్రాయాలు వినిపిస్తున్నాయి. యువ ప్రతిభకు అవకాశం ఇవ్వాలనే ఉద్దేశంతో వైభవ్‌కు తుది జట్టులో చోటు దక్కుతుందా లేదా అన్నది మ్యాచ్‌కు ముందు ప్రధాన ఆసక్తిగా మారింది. చివరి నిర్ణయం మాత్రం టీమ్ మేనేజ్‌మెంట్ చేతుల్లోనే ఉండటంతో రెండో టీ20 జట్టు కూర్పుపై అభిమానులు ఆసక్తిగా ఎదురుచూస్తున్నారు.